Shumë nga ne shumicën e detyrave të përditshme online, siç janë leximi i e-mailave, shkrimin, shfletimin e RSS apo humbjen e kohës në Facebook, e bëjmë nëpërmes shfletuesit të vebit. Mu për këtë është shumë e rëndësishme që aplikacionet komplekse të vebit të kompletohen sa më shpejtë, e pikërisht këtë do ta mundësoj versioni i radhës i shfletuesit Firefox 3.1. Aplikacionet si Gmail e Facebook do të punojnë dukshëm më shpejtë falë teknologjisë së quajtur TraceMonkey, e cila përshpejton punën e programeve të shkruara në gjuhën programuese JavaScript.
Ndryshimi në shpejtësi do të duhej të ishte dramatik, derisa disa teste preliminare të cilat i kanë paraqitur në Mozilla shfaqin përshpejtime prej 20.8 deri në 37.5 herë më të mëdha për dallim nga Firefox 3.0. Firefox 3.1 do të duhej të paraqitej diku kah fundi i vitit, e tani edhe kemi arsye që ta presim me padurim.

Versioni i tetë i shfletuesit të popullarizuar të internetit Internet Explorer do të paraqitet në versionin e tij të dytë eksperimental më 28 gusht, derisa versioni final i ‘tetëshit’ arrin në muajin nëntor të këtij viti. Sipas blogeres së besueshme të faqes së internetit ZDNet, Mary-Jo Foley, këto janë informata të vërtetuara.
Internet Explorer 8 Beta 2 deri në fund të këtij muaji do të jetë në dispozicion për shkarkim dhe shfrytëzim pa pagesë mu sikur paraardhësi i tij, versioni eksperimental Beta 1. Përditësimi i Internet Explorer në Beta 2 do të jetë i mundur nëpërmes shërbimit Automatic Updates, derisa shfletuesi është kompatibil me sistemet operative Windows XP, Vista si dhe Windows Server 2003 e 2008.

Kompania Lenovo ka lëshuar në shitje dy laptopë për të cilët pohon se janë laptopët më të fuqishëm që ka prodhuar ndonjëherë. W500 fillon me çmimin 1.629 dollarë dhe ofron procesor të Intelit Core 2 Duo me takt punues 2.53 GHz, dhe ekran të diagonales 15'4 inçësh, 1 GB DDR3 të memories punuese, disk të fortë me kapacitet 100 GB dhe kartelën grafike të ATI, Mobility FireGL V5700 me 512MB memorie. Vëllai i tij i madh W700 ka diagonale të ekranit prej 17 inçësh dhe qysh në fillim është pothuajse dy herë më i shtrenjtë – qëndron 2.978 dollarë. Procesori i integruar është ai nga Intel T9400, kartelë grafike NVIDIA Quadro FX2700, derisa kapaciteti i diskut të fortë është 160 GB. 2 GB të integruar DDR3 RAM ne na duket tepër pak për këtë çmim, mirëpo kush do, mund të shtoj edhe më shumë memorie të punës.
Ajo çfarë na pëlqen jashtëzakonisht është fakti se këta ThinkPad janë megjithatë pak më ndryshe (lexo: më të bukur) sesa dizajni standard i cili për këta laptopë nuk ka ndryshuar me vite të tëra.

Javën e ardhshme nga prodhuesi Samung na vjen celulari i cili do të mund të paralajmëronte fundin e epokës së fotoaparateve digjitale. Samsung i8510 është celulari i parë me kamerë prej 8 megapikselash, derisa kualiteti i tij mund të matet me kualitetin e fotografisë të cilitdo fotoaparati digjital. Prodhuesi vlerëson se ky telefon dhe të ngjashmit me të nga kompanitë tjera konkurrente do të mund të përjashtonin nga loja kamerat digjitale.
Problemi i vetëm që mbetet është ai i madhësisë dhe thjesht fizikisht nuk mund të vendosen objektivat e mëdhenj dhe kjo është pika ku kamera tradicionale/fotoaparati gjithmonë do të jetë në përparësi. Derisa ky produkt përgatitet për dalje në treg, në Sony Ericsson veçmë po përgatiten për versionin e vet të njëjtit, merr vesh Daily Mail. Në Samsung i8510 do të gjeni HSDPA, GPS, WiFi, FM radio, madje edhe 16 GB hapësirë për mbushje, që mund të shtohet edhe më tej me anë mikro kartelave.

Kompanitë në mbarë botën janë të gatshme të bëjnë çfarëdo për të promovuar produktet apo shërbimet e tyre, derisa filiali polak i operatorit britanik të telefonisë mobile, Orange, i ka rënë në mend një ide bukur origjinale. Orange në Poloni ka menduar një mënyrë interesante se si t’i tërheq njerëzit për të blerë pajisjen iPhone nga Apple – në rreth njëzet vende të shitjes ka angazhuar aktorë të cilët kanë krijuar radhë para dyqaneve.
Zëdhënësi i filialit polak të operatorit Orange këtë edhe ia ka pranuar agjencisë së lajmeve Reuters: “Kemi krijuar radhë artificiale para njëzet dyqaneve tona për të tentuar ta rrisim interesimin për iPhone”. Nuk e dimë se çfarë në të vërtetë mendojnë në zyrën kryesore të Orange apo kjo është ide e pavarur e filialit të saj në Poloni. iPhone në këtë vend evropian është paraqitur të premtën më 22 gusht.

Pothuajse i pabesueshëm duket fakti se përkundër të gjitha përpjekjeve të kompanive për siguri kompjuterike, spamit duket se kurrë nuk do t’i vjen fundi. Askush nuk e do prandaj do të ishte e logjikshme që spamerët të heqin dorë nga puna e tyre e pistë, mirëpo sipas disa analizave, për shkak të marrëzisë së njeriut kjo nuk do të ndodhë. Kompania Marshal, e cila merret me hulumtime në fushën e sigurisë kompjuterike, raporton se madje 29.1 për qind e shfrytëzuesve të internetit ka blerë në një periudhë kohore ndonjë produkt i cili është reklamuar në mënyrë të tillë, edhe pse e kanë ditur qartë se bëhet fjalë për spamin më të rëndomtë. Këto rezultate kanë dalë pas anketës së kryer në të cilën kanë marrë pjesë 622 shfrytëzues të internetit.
Pothuajse 30 për qind e të anketuarve kanë deklaruar se kanë blerë ndonjë nga produktet të cilat u kanë ofruar nëpërmes spamit, dhe atë më shpeshti tableta për përmirësimin e jetës seksuale, produkte nga industria e kënaqësisë për të rriturit, softver dhe produkte luksoze siç janë orët e dorës, stoli dhe gjëra të ngjashme. Ajo që brengos është fakti se shumica e spamit për shkak të veprimeve të ofruesve të shërbimeve të internetit nuk kalojnë përndryshe kjo përqindje do të ishte sigurt më e madhe.

Nganjëherë loja në celular nuk është edhe aq interesante. Është vështirë ta kontrollosh lojën duke përdorë tastierën e celularit. Prandaj këtu është Zeemote, joystick-u i parë për telefonat celularë. Zeemote në celular lidhet me anë të Bluetooth. Është intuitiv për përdorim, mu sikur Wiimote, dhe u mundëson precizitet të madh gjatë lojës. Pajisja tani për tani mund të blihet vetëm në Holandë, mirëpo Nokia do të ndryshojë këtë fakt.
Në fakt kompania ka vendosur të shtoj joystick-un Zeemote në pajisjet standardet shtesë për telefonat e saj celularë. Zeemote do të jetë kompatibil me lojërat si dhe me të gjitha aplikacionet tjera në telefon, përfshirë edhe playerët për muzikë dhe shfletuesit për veb.

Ashtu siç pritej, pajisja Lenovo IdeaPad U8 është lansuar gjatë Lojërave Olimpike në Pekin dhe përfundimisht janë paraqitur edhe performansat e saj zyrtare. Kjo pajisje MID (Mobile Internet Device) është e dedikuar vetëm për tregun aziatik, derisa është e pajisur me procesorin më të ri mobil Atom i cili funksionon në 800 MHz dhe ka memorie punuese prej një apo dy GB dhe diskun e memories prej 6 GB. Ekrani me madhësi prej 4.8 inçësh, natyrisht, i ndjeshëm në prekje, menaxhohet me stylus (apo me thonj të gjatë), posedon dy kamera dhe qasje USB për lidhje të komponentëve shtesë - siç mund të jetë TV tunner. Teknologjia wireless (pa tela) e punuar në pajisje përbëhet nga GPS, EDGE, Bluetooth, Wi-Fi derisa mbështetja për WiMAX e 3G ende mbetet fshehtësi.
Lenovo fillon me shitjen e IdeaPad U8 në fillim të muajit tetor me çmim tani për tani të panjohur, por i cili nuk do të duhej të kishte shumë dallim nga një smartphone mesatar në tregun lindor.

Kompania japoneze, Sony Computer Entertainment gjatë muajit tetor do të plasojë në tregjet e Amerikës, Azisë dhe të Evropës një model të ri, të avancuar, të video-konzolës Play Station Portable (PSP). Që prej muajit dhjetor 2004, kur PSP për herë të parë është paraqitur në treg, në mbarë botën veçmë janë shitur 41 milionë njësi të kësaj video-konzole të popullarizuar, në të cilën ka mundësi që, përveç lojërave, të dëgjohet muzikë dhe të shikohen filma. Risia e kompanisë Sony "PSP-3000" – edhe pse me dizajn dhe funksione të pandryshuara, ka rezolucion dukshëm më të madh të ekranit dhe mikrofon të instaluar.
Çmimi i konzolës në Shtetet e Bashkuara të Amerikës dhe Kanada do të jetë 199.99 dollarë, derisa në Evropë vjen me çmim prej 199 eurosh, derisa çmimi për tregun aziatik ende mbahet në fshehtësi.